काठमाडौं । सेती प्रादेशिक अस्पताल धनगढीले अनशनरत डा. गोविन्द केसीलाई अन्य अस्पतालमा स्थानान्तरण गर्न सुझाव दिएको छ । डा. केसी ८ दिनदेखि सेती प्रादेशिक अस्पतालमा अनसनरत छन् ।
उनको स्वास्थ्य अवस्था नाजुक बन्दै गएपछि अन्यत्र रिफर गर्न सुझाव दिइएको अस्पतालले सोमबार एक सूचना जारी गर्दै जनाएको छ । डा. केसीको उपचार गर्न बहुविशेषज्ञ भएको विशिष्टिकृत अस्पतालमा स्थानान्तरण गर्न पनि सूचनामा सुझाइएको छ ।
भदौ २७ गतेदेखि अनशनरत डा. केसीले राखेका मागबारे सरकारले भने अझैसम्म कुनै पनि सुनुवाइ गरेको छैन । डा. केसी र सरकारी पक्षबीच आइतबार पहिलो चरणको वार्ता भए पनि निष्कर्षविहीन भएको थियो ।
