घोराही, १२ कार्तिक । नेकपा माओवादी केन्द्रका स्थायी समिति सदस्य एवम् पूर्व मन्त्री रेखा शर्माले आगामी मंसिर ४ गतेको निर्वाचनमा दाङबाट प्रतिगामी शक्तिहरू बढारिने बताएकी छिन् ।
दाङ निर्वाचन क्षेत्र नं २ बाट सत्तारूढ दलहरूको तर्फबाट प्रतिनिधिसभा सदस्यका साझा उम्मेदवार समेत रहेकी शर्माले दाङमा गठबन्धनको जित सुनिश्चित भएको बताईन् । “हामी दाङलाई समृद्ध बनाउन चाहन्छौं, दाङको विकासको स्पष्ट खाका हामीसँग छ,“ उनले भनिन्, “मतका हिसाबले प्रतिगामी गठबन्धन भन्दा धेरै अघि छौं, एमाले दाङमा तीब्र असन्तुष्टि देखिएको छ, त्यो मत पनि हामीलाई आउँछ ।’
एमाले नेता शंकर पोखरेल अध्ययन मननमा राम्रै नेता भए पनि जनताको प्रतिनिधि भएर जनताको सेवा गर्ने नेचरको नभएको शर्माको भनाइ छ । “दाङमा उहाँले निर्वाचन जितेको भन्दा हारेको ईतिहास धेरै छ,“ शर्माले भनिन्, “यसपटक पनि उहाँले निर्वाचन जित्ने कुनै आधार छैन ।“
टिकट वितरणमा एमालेल इमान्दार तथा पुराना नेता कार्यकर्तालाई पाखा लगाएर अवसरवादीहरूलाई काखि च्यापेको उनको आरोप छ ।
नेपाली काङ्ग्रेसका नेता एवम् प्रदेशसभा २ (१) का गठबन्धनका साझा उम्मेदवार राजु खनालले मंसिर ४ पछि पनि पाँच वर्ष नै एमाले सरकार बाहिर बस्ने बताए । उनले साढे तीन वर्ष मुख्यमन्त्री हुँदा शंकर पोखरेलले कुनै गतिलो काम गर्न नसकेको बताए ।
