भक्तपुर, २३ असार । भक्तपुर अस्पतालले घरदैलो कार्यक्रम सञ्चालन गर्ने भएको छ । अस्पतालले भक्तपुर जिल्लाभित्रका चार वटै नगरपालिकामा घरदैलो कार्यक्रम सञ्चालन गर्न लागेको हो ।
अस्पतालका मेडिकल सुपेरिटेन्डेण्ट डा. सुमित्रा गौतमका अनुसार सो कार्यक्रम सञ्चालन गर्नको लागि अस्पतालले तयारी गर्दै आएको छ । तयारी पुरा भएसँगै चार वटै पालिकामा घरदैलो सेवा सञ्चालन गर्ने जनाएको छ । उनले सूर्यविनायक र चाँगुनारायण नगरपालिकाका कतिपय स्थानीय बासिन्दा अस्तापलको सेवाबाट बञ्चित भएकोले सो सेवा सञ्चालन गर्न लागेको बताइन् । कार्यक्रम सञ्चालन गर्नको लागि चार वटै नगरपालिकाका नगरप्रमुखसँग कुराकानी गरिसकेको बताइन् ।
चाँगुनारायण नगरपालिका र सूर्यविनायक नगरपालिकाबाट सो कार्यक्रम सञ्चालन गर्ने उनको योजना छ । मध्यपुर थिमि र भक्तपुर नगरपालिकामा पनि सेवा विस्तार गरिने उनले बताइन् । स्थानीय बासिन्दालाई स्वास्थ्य सेवा दिनको लागि घरदैलो कार्यक्रम सञ्चालन गर्न लागेको उनले बताइन् ।
