तेस्रो आँखा
काठमाडौं, १३ पुस । नेपालले एसियन सिनियर सेन्ट्रल जोन पुरुष तथा महिला भलिबल च्यालेन्ज कप अन्तर्गत महिलातर्फको उपाधि जितेको छ ।
बंगलादेशको ढाकामा आज सम्पन्न खेलमा उज्वेकिस्तानलाई ३—२ को सेटमा हराउँदै नेपाल च्याम्पियन बनेको हो । मिरपुरस्थित शाहिद शुरवार्दी इन्डोर स्टेडियममा नेपालले पहिलो सेट २५—२४ ले जितेको थियो । दोस्रो सेटमा उज्वेकिस्तान २५—२४ ले विजयी भयो ।
तेस्रो सेट नेपालले २५—१५ ले जित्यो । चौंथो सेट उज्वेकिस्तानले २५—२२ ले जित्दै खेल २—२ को अवस्थामा पुर्राए । त्यसपछि पाँचौं सेट १५—१० ले आफ्नो बनाउँदै नेपालले उपाधि रक्षा गरेको हो ।
नेपाल अपराजित रहदै च्याम्पियन बनेको हो । यस्तै सेन्ट्रल जोनको महिलातर्फ नेपाल लगातार दोस्रो पटक च्याम्पियन बनेको हो । नेपालको यो दोस्रो अन्तराष्ट्रिय उपाधि समेत हो । नेपालले यसअघि सन् २०१९ मा सोही रंगशालामा आयोजित पहिलो संस्करणमा माल्दिभ्सलाई हराएर उपाधि उचालेको थियो ।
