तेस्रो आँखा
काठमाडौं,२३ पुस । संकटा क्लब र सातदोबाटो क्लबले बराबरी खेलेका छन् । जारी ए डिभिजन लिगको आठौं चरण अन्तर्गतको पहिलो खेलमा संकटा क्लब र सातदोबाटो क्लबले एक एक को बराबरी खेलेका हुन् ।
काठमाडौंको त्रिपुरेश्वर स्थित दशरथ रंगशालामा भएको खेलमा दुबै टोलिले पहिलो हाफमा एक एक गोल गरेका थिए । खेलको २२ औं मिनेटमा सुशिल राइले गोल गर्दै सातदोबाटोलाई अग्रता दिलाएका थिए । जय गुरुङले खेलको ३२ औं मिनेटमा गोल गर्दै संकटालाई खेलको बराबरीमा फर्काएपनि एक अंकमा चित्त बुझाउनु पर्यो ।
दोस्रो हाफमा दुवैले गोल गर्ने केहि अवसर बनाए पनि गोल भने गर्न सकेनन् । यो खेलसंगै संकटा आठ खेलमा १४ अंक सहित तालीकाको तेस्रो स्थानमा छ भने समान आठ खेल खेलेको सातदोबाटो नौ अंक सहित तालीकाको नवौं स्थानमा छ । तालीकाको शिर्ष स्थानमा मछिन्द्र छ भने मनाङ मस्याङ्दी क्लब दोस्रो स्थानमा छ ।
