काठमाडौं, ६ माघ । आहा रारा गोल्डकपमा विभागिय टिम एपिएफले सहारा क्लब पोखरालाई दुई शून्यले पराजित गर्दै विजय सुरुवात गरेको छ।
मोफसलकै चर्चित खेल आहा रारा गोल्ड कपको २० औं संस्करण पोखराको पोखरा रंगशालामा बिहीबारदेखि सुरु भएको छ। २० औं संस्करणको पहिलो खेलमा एपिएफले साहारा क्लब पोखराविरुद्ध आवास लामिछाने र प्रदिप लामाको एक एक गोलको मदतले दुुई शून्यको जित हासिल गरेको हो ।
एपीएफका लागि आवास लामिछानेले खेलको १४ औं मिनेटमा गोल गर्दै टिमलाई अग्रता दिलाएका थिए भने प्रदिप लामाले खेलको ६० औं मिनेटमा गोल गर्दै अग्रतालाई दोब्बर बनाएका थिए ।
सहारा क्लब पोखराले खेलमा केही गोल गर्ने अवसर बनाएपनि गोल गर्न नसक्दा एपीएफलाई दुई शून्यको नतिजा सुम्पिनु परेको हो।
आहा रारा गोल्डकपका सबै खेलहरु नकआउट चरणमा हुनेछन्। आवास लामिछाने २० औं संस्करणको आहा रारा गोल्ड कपमा गोल गर्ने पहिलो खेलाडी बनेका छन्।
