काठमाडौं, ६ माघ । हिमालयन शेर्पा क्लबलाई सडनडेथमा पराजित गर्दै विभागीय टोली नेपाल पुलिस आहा रारा गोल्डकपको दोस्रो चरणमा प्रवेश गरेको छ।
शुक्रबार पोखराको पोखरा रंगशालामा भएको २० औं चरणको दोस्रो खेलमा दुबै टिमले ९० मिनेटको समयमा एक एक बराबरी खेलेका थिए। त्यसपछि खेल पेनाल्टी शुटआउटमा गएको थियो, त्यसमा पनि बराबरी भएपछि खेल सडनडेथमा गएको थियो।
पुलिसका लागि खेलको ५१ औं मिनेटमा निरकुमार राई ले गोल गर्दै टिमलाई अग्रता दिलाएका थिए। एक शुन्यले पछाडी परेको टिमलाई खेलको ५८ औं मिनेटमा कप्तान विश्वास श्रेष्ठले गोल गर्दै हिमालयन शेर्पालाई खेलको एक एक को बराबरीमा फर्काएका थिए।
९० मिनेटको समयमा एक एक को बराबरी भएपछि खेलमा १५/१५ मिनेट गरि थपिएको ३० मिनेटको समयमा पनि दुबैतर्फबाट गोल नआएपछि खेल पनाल्टीतर्फ धकेलिएको थियो।
पेनाल्टी शुटआउटमा पनि पाँच/पाँच पेनाल्टीमा दुबै टिमले चार/चार गोलको बराबरी खेलेका थिए। त्यसपछि खेल सडनडेथमा गएको थियो। सडनडेथमा पूर्ण बहादुरले गरेको प्रहारलाई पुलिसका गोलकिपर रोशनले रोक्दै पुलिसको जीत सुनिश्चित गरे।
सडनडेथमा दुबै टिमका दुई/दुई खेलाडीले गोल प्रहार गरेका थिए तर त्यसमा हिमालयन शेर्पाका एक खेलाडीले गोल गर्नबाट चुक्दा जीत सुम्पिनु परेको हो। नेपाल पुलिस आहा रारा गोल्ड कपको पाँच पटकको च्याम्पियन हो।
