तेस्रो आँखा
काठमाडाैं,६ फागुन । अमेरिकाको क्यालिफोर्नियाले कोरोना भाइरस (कोभिड १९) लाई महामारी नभइ नियमित रोग भएको घोषणा गरेको छ । कोभडि १९ लाई महामारीको साटो नियमित रोग ‘इन्डेमिक’ घोषणा गरेको हो । कोरोना भाइरसका सन्दर्भमा स्वास्थ्य नीतिमा परिवर्तन गरेर नियमित रोग घोषणा गर्ने क्यालिफोर्निया अमेरिकाको पहिलो राज्य भएको छ ।
महामारीको झण्डै २ बर्षपछि गभर्नर गेभिन न्युसोमले बिहिबार यस्तो घोषणा गरेका हुन् । संकटको चरणबाट भाइरससँगै बाँच्नसकिने चरणमा प्रवेशका लागि यस्तो नीति लिइएको गभर्नरले बताए ।
समुदायमा भाइरस रहेपनि प्रतिरोधात्मक क्षमता विकासले व्यवस्थापन गर्न सकिने अवस्थामा कुनै पनि रोग पुगेपछि त्यसलाई ‘इन्डेमिक’ भनिन्छ । मास्कको प्रयोग अनिवार्याता हटाउनेबारे नीति घोषणाकै परिप्रेक्ष्यमा क्यालिफोर्नियाले कोभिड १९ लाई नियमित रोग घोषणा गरेको हो ।
अन्य देशले कोरोना भाइरसलाई महामारीकै रुपमा लिएका छन् । अन्य रोगहरुजस्तै नियमित संक्रमण भैरहने कोरोना भाइरसको त्रासबाट नागरिकलाई मुक्त गराउन र नियमित कामकारबाहीलाई अघि बढाउन अन्य देशहरुले पनि यसलाई सामान्य रोगका रुपमा लिनुपर्ने अवस्था आइसकेको छ ।
