तेस्रो आँखा
काठमाडौं, १२ फागुन। सहीद स्मारक ‘ए’ डिभिजन लिग फुटबल अन्तर्गत लिगको आफ्नो अन्तिम खेलमा सातदोबाटो युथ क्लबले जित निकालेको छ ।
एन्फा कम्प्लेक्समा बिहीबार भएको खेलमा सातदोबाटोले च्यासल युथ क्लबलाई एक शुन्य गोल अन्तरले हराएको हो ।
सातदोबाटोलाई जित दिलाउन मार्टिन्स अजयीले निर्णायक गोल गरे ।
खेलको सातौं मिनेटमा मार्टिन्सले गोल गरेका हुन् ।
यस जितसँगै सातदोबाटोले लिगमा सुखद अन्त्य गरेको छ । सातदोबाटो लिगको तेस्रो स्थानमा समेत उक्लिएको छ ।
सातदोबाटोले १३ खेलमा २१ अंक जोडेको छ ।
च्यासलले भने हारबाट लिगको अन्त्य गरेको छ । र, बी डिभिजनमा घटुवा भएको छ ।
च्यासल १३ खेलमा ६ अंक जोडेर पुछारमा रहेको छ ।
त्यस्तै आजै भएको अर्को खेलमा हिमालयन शेर्पा क्लब र फ्रेन्ड्स क्लबले बराबरी खेलेका छन् ।
त्रिपुरेश्वरस्थित दशरथ रंगशालामा बिहीबार भएको खेलमा हिमालयन र फ्रेन्ड्सले एक एक गोलको बराबरी खेलेका हुन् ।
प्रतिस्पर्धात्मक खेलमा सुरुआती अग्रता भने फ्रेन्ड्सले बनाएको थियो ।
खेलको ७३ औं मिनेटमा हिमालयनका दिवस उराउले आत्मघाती गोल गरेपछि फ्रेन्ड्सले एक शुन्य गोलको अग्रता बनाएको थियो ।
तर, खेलको ८९ औं मिनेटमा विशन गुरुङले गोल गर्दै हिमालयनलाई एक एक गोलको बराबरीमा ल्याएका थिए ।
यस बराबरीसँगै हिमालयन र फ्रेन्ड्सले लिगको अन्त्य गरेका छन् ।
हिमालयनले १३ खेलमा १४ अंक जोडेको छ । हिमालयन नवौं स्थानमा उक्लिएको छ ।
फ्रेन्ड्सले १३ खेलमा ११ अंक जोडेको छ । फ्रेन्ड्स १२ औं स्थानमा रहेको छ ।
