लोक राज डाँगी
भो बा म नेता बन्दैन
भो बा म नेता बन्दैन
किनकी
हर बखत झूठ र झगडा गर्नु पर्छ
परिक्रमा गरेर पद पाउनु पर्छ
पाउ परेर पद जोगाउनु पर्छ
पैसाका लागि अरुको पसिना सोस्नु पर्छ
बरु म लाहुरै जान्छु
फर्केर आउदा लाहुरे आएछ त भन्लान
कमसेकम कुन चोर आए छ त न भन्लान ॥
भो बा म नेता बन्दैन
भो बा म नेता बन्दैन
किनकी
अस्पताल हैन भ्यु टावर बनाउनु पर्छ
पुल छैन पानी जहाज ल्याउनु पर्छ
गास छैन ग्यास जोड्नु पर्छ
जनता झुक्याउन रेल चढ्न पर्छ
बरु म भारी नै बोक्छु
गाउँगाउँ डुल्दा भरिया आएछ त भन्लान
कमसेकम कुन भ्रष्टचारी आएछ त न भन्लान ॥
भो बा म नेता बन्दैन
भो बा म नेता बन्दैन
किनकी
चुनावको चटारो हुँदैन
कोट फेर्ने र पिर्के सलामी खाने हतारो हुँदैन
अरु त कुरै छाडौं पहिला एउटा साइकल खटारो हुँदैन
देस हैन दुनिया ओकेल्न लठारो हुँदैन
बरु म पौरखै गर्छु
एक छाक पौरखैले खाएछ भन्लान्
कमसेकम राज्यको ढुकुटी नै रित्याएछ त न भन्लान ॥
भो बा म नेता बन्दैन
भो बा म नेता बन्दैन
किनकी
पाँच वर्ष पजेरो र धाक–धक्कु पछि कतिको त बयल गाडा हुँदैन
बन्जी र स्विडमा रमाउदै गर्दा तुईनको पिडाले छुदैन
पोलेको मासु टिमुरको चट्नी, आर्सिको थालीमा मार्सी भात सधै हुँदैन
नाङ्गो शरीर, भोको पेट, विरामी जनता देखेनी त्यो मन कहिल्यै रुँदैन
बरु म गितै गाउँछु
मेला उत्सवमा कलाकार आए छ भन्लान
कमसेकम देस बेमानले खाएछ त न भन्लान ॥
भो बा म नेता बन्दैन
भो बा म नेता बन्दैन
किनकी
तस्करहरुको लस्करसँग हात मिलाउनु पर्छ
ठेकेदारहरुसँग मिठो बात मिलाउनु पर्छ
महाकाली सुकोस या कालापानी दुखोस दलालहरुसँग औकात मिलाउनु पर्छ
सक्दैन म दुष्टहरुसँग निर्मलाहरुलाई राहत दिलाउनु पर्छ
बरु म टालेरै लाउछु
हजारौको भिडमा भिखारी आएछ त भन्लान
कमसेकम कमिशन खाएर काँचुली फेरेछ त न भन्लान ॥
