काठमाडौं, १७ मंसिर । नेपाल प्रिमियर लिग (एनपिएल)मा जनकपुर बोल्ट्सले लगातार दोस्रो जित निकालेको छ । आज भएको एनपिएलको तेस्रो खेलमा कर्णाली याक्सलाई ८ विकेटले पराजित गर्दै जनकपुर बोल्ट्सले लगातार दोस्रो जित निकालेको हो ।
जितका लागि पाएको १४२ रनको लक्ष्य जनकपुरले १५.१ ओभरमा पुरा गर्यो ।
जनकपुर बोल्ट्सको जितमा कप्तान अनिल शाहले आक्रामक अर्ध शतक बनाए । ४२ बलको सामना गरेका अनिलले ६२ रन बनाए । जनकपुरका मार्की तथा ओपनर आशिफ शेखले ३६ रन बनाए । लाहिरु मिलन्थाले २४ रनको आक्रामक पारि खेले । जेम्स निशाम १६ रनमा नट आउट रहे ।
कर्णालीका लागि मौसम ढकाल र जिशान मकसूदले समान १–१ विकेट लिए ।
