पश्चिम नवलपरासी, असोज १० । लुम्बिनी प्रदेशका मुख्यमन्त्री चेतनारायण आचार्यले जेनजी आन्दोलनका क्रममा पश्चिम नवलपरासीमा क्षति पुगेका सरकारी तथा निजी संरचनाको आज अनुगमन गर्नुभएको छ।
आगजनी र तोडफोडका कारण सरकारी कार्यालयका भवन र कागजात नष्ट भएको भन्दै उहाँले यसलाई गम्भीर अपराधिक कार्यका रूपमा टिप्पणी गर्नुभयो। मुख्यमन्त्री आचार्यले भन्नुभयो, “जेनजी पुस्ताले भ्रष्टाचार र सुशासनलाई मुख्य एजेन्डा बनाएर आन्दोलन गरेका थिए, तर यसरी संरचना जलाउने काम उनीहरूबाट हुन सक्दैन। यो प्रतिशोधपूर्ण र आपत्तिजनक काम हो।”
ध्वस्त भएका कार्यालयमार्फत सेवा प्रवाह नरोकिने बताउँदै मुख्यमन्त्रीले तत्काल राहत रकम पठाइएको र अस्थायी टेन्ट टाँगेर भएपनि जनतालाई सेवा दिन कर्मचारीलाई आह्वान गरिएको जानकारी दिनुभयो। पुनर्व्यवस्थापनका लागि प्रदेश सरकार अगाडि बढिरहेको पनि उहाँले स्पष्ट गर्नुभयो। उहाँले आचार्यले जेनजी आन्दोलनका क्रममा परिवारका एक सदस्यको राजनीतिक संलग्नताका कारण सिंगो परिवारले दुस्ख भोग्नु परेको अवस्थाप्रति चिन्ता व्यक्त गर्नुभयो।
पश्चिम नवलपरासीमा जिल्लामा सबैभन्दा बढी निजी सम्पत्तिमा क्षति पुगेको छ। मुख्यमन्त्री आचार्यले नवलपरासीमा क्षति पुगेका सबै संरचनाको प्रत्यक्ष अनुगमन गर्ने कार्यक्रम रहेको प्रदेश सरकारले जनाएको छ।
