तेस्रो आँखा
काठमाडौं, १३ चैत्र । नेपाली राष्ट्रिय फुटबल टोली मैत्रीपूर्ण फुटबलमा थाइल्याण्डको शीर्ष डिभिजनको क्लब चोनबुरी एफसीसँग पनि तीन एक को गोल अन्तरले पराजित भएको छ । दुई मैत्रीपूर्ण खेलका लागि थाइल्यान्ड भ्रमणमा रहेको नेपाली टोली बिहीबार पनि थाइल्यान्डसँग दुई शून्य गोल अन्तरले पराजित भएको थियो ।
आइतबार चोनबुरी स्टेडियममा भएको खेलमा नेपालले निराशाजनक हार बेहोर्नुपर्यो। थाइल्यान्डका लागि फान्थामित प्रफानात, रेनाटो केलिच र नाटापोङले एक–एक गोल गर्दा नेपालका लागि दर्शन गुरुङले एक गोल फर्काए । खेलको २४ औं मिनेटमा फान्थामितले गोल गर्दै चोनबुरीलाई सुरुआती अग्रता दिलाएका थिए ।
खेलकाे ६५ औं मिनेटमा रेनाटोले गोल गर्दै चोनबुरीको अग्रता दुई शून्य को बनाए । खेलको ८३ औं मिनेटमा दर्शनले गोल गर्दै नेपाललाई दुई एक गोलको स्थितिमा ल्याए । त्यसपछि खेलको इन्जुरी समयमा नाट्टापोङले गोल गर्दै घरेलु टोलीलाई तीन एका गोलको जित दिलाए ।
एसियन कप छनोटमा नेपाल समूह ए मा रहेको छ । सो समूहमा नेपालसहित कुवेत, इन्डोनेसिया र जोर्डन रहेका छन् । नेपालको समूहको छनोट खेलहरु कुवेतमा आयोजना हुनेछ । छनोट खेलहरु जुन आठदेखि १४ सम्म हुनेछ । नेपालले जुन आठमा जोर्डनसँग, जुन ११ मा कुवेतसँग र जुन १४ मा इन्डोनेसियाविरुद्ध खेल्नेछ ।
