काठमाडौँ, कात्तिक २८ । नेपाल प्रिमियर लिग (एनपिएल) अन्तर्गत आज हुने खेलमा लुम्बिनी लायन्सले टस जितेर पहिले बलिङ गर्ने निर्णय गरेको छ । लुम्बिनीले विराटनगर किङ्सलाई पहिले ब्याटिङको निम्तो दिएको हो ।
कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा केही बेरअघि भएको टसमा लुम्बिनीका कप्तान रोहितकुमार पौडेलले पहिले फिल्डिङ गर्ने निर्णय लिनुभएको हो ।
आजको खेल विराटनगरका लागि महत्त्वपूर्ण छ । लुम्बिनीलाई हराउन सके विराटनगरको प्लेअफ सम्भावना कायम रहनेछ भने पराजित भए उसको प्लेअफ यात्रा समाप्त हुनेछ ।
विराटनगर यो खेल जित्नैपर्ने दबाबमा छ । लुम्बिनीले भने एक खेलअगावै प्लेअफमा स्थान सुरक्षित गरिसकेको छ । लुम्बिनीले छ खेल खेल्दा चारमा जित, एकमा हार र एक खेलमा वर्षाका कारण अङ्क बाँडेको छ ।
लुम्बिनी अहिले अङ्कतालिकाको दोस्रो स्थानमा छ । तालिकाको पाँचौँ स्थानमा रहेको विराटनगरले छ खेल खेल्दा तीनमा जित र तीनमा हार व्यहोरेको छ ।
जारी संस्करणमा अहिलेसम्म सुदूरपश्चिम रोयल्स र लुम्बिनी लायन्सले प्लेअफमा स्थान सुरक्षित गरेका छन् ।
लिग चरणका खेलहरू सकिएपछि अङ्कतालिकाको शीर्ष चार टोली प्लेअफमा प्रवेश गर्नेछन् ।
