तेस्रो आँखा
काठमाडौं, २२ चैत्र। सामाजिक क्लबका रुपमा २०६६ सालमा स्थापना भएको चर्च ब्वाइज युनाइटेड ‘बी’ डिभिजनको च्याम्पियन बन्दै ‘ए’ डिभिजन लिगमा बढुवा भएको छ । सी डिभिजन छनोट खेलेको दुई वर्षमै चर्च ब्वाइज ए डिभिजन श्रेणीमा उक्लिएको हो ।
सहिद स्मारक बी डिभिजन लिग अन्तर्गत मंगलबार बाँसबारी क्लबलाई पाँच एक गोल अन्तरले हराउँदै चर्च ब्वाइज शीर्ष डिभिजनमा उक्लिएको हो । एन्फा कम्प्लेक्स सातदोबाटोमा चर्च ब्वाइजलाई जित दिलाउन साइमन लिम्बुले ह्याट्रिकसहित चार गोल गरे । खेलको सातौं मिनेटमा साइमनले गोल गर्दै चर्च ब्वाइजलाई सुरुआती अग्रता दिलाएका थिए ।
१७ औं मिनेटमा आशिष चौधरीले गोल गर्दै चर्च ब्वाइजको अग्रता दोब्बर बनाए। खेलको ३७ औं मिनेटमा साइमनले व्यक्तिगत दोस्रो गोल गर्दै टिमको अग्रता तीन शून्य को बनाए । खेलको ४१ औं मिनेटमा साइमनले पेनाल्टीबाट गोल गर्दै ह्याट्रिक पूरा गरेपछि चर्च ब्वाइज चार एक ले अघि रह्यो । ५८ औं मिनेटमा संजय धिमालले गोल गर्दै बाँसबारीलाई चार एक को स्थितिमा ल्याए ।
त्यसपछि खेलको ८१ औं मिनेटमा साइमनले पेनाल्टीबाट व्यक्तिगत चौंथो गोल गर्दै चर्च ब्वाइजलाई पाँच एक को जित दिलाए ।यस जितसँगै शीर्ष स्थानको चर्च ब्वाइजले १२ खेलमा २६ अंक जोडेको छ । र, चर्च ब्वाइज एक खेल अगाबै च्याम्पियन बनेको हो । बाँसबारीले १२ खेलमा १६ अंक जोडेको छ । चर्च ब्वाइज बी लिग खेलेको पहिलो सिजनमै शीर्ष डिभिजनमा बढुवा भएको हो । चर्च ब्वाइजले २०७७ मा सी डिभिजन लिग खेलेको थियो ।
