काठमाडौं, १४ मंसिर । फ्रान्सेली क्लब क्लब पेरिस सेन्ट जर्मेन (पीएसजी) का फरवार्ड अर्जेन्टिनाका लियोनल मेस्सीले बालोन डी ओर अवार्ड जितेका छन् । सोमबार राति स्टार खेलाडी लियोनल मेस्सीले २०२१ को उत्कृष्ट खेलाडी बन्दै यो अवार्ड जितेका हुन् ।
मेस्सीले कीर्तिमानी सातौं पटक बालोन डी'ओर अवार्ड जितेका हुन् । मेस्सीले २००९, २०१०, २०११, २०१२, २०१५ र २०१९ मा यस अवार्ड जितिसकेका थिए ।
मेस्सीले रोबर्ट लेवान्डोस्की र जर्गिन्होलाई पछि पार्दै अवार्ड जितेका हुन् । मेस्सी बालोन डी ओर जित्ने पीएसजीका पहिलो खेलाडी समेत बने । मेस्सीले आफ्नो कप्तानीमा अर्जेन्टिनालाई कोपा अमेरिकाको उपाधि दिलाएका थिए ।
म्यानचेस्टर युनाईटेडका लागि खेल्ने पोर्चुगलका फरवार्ड क्रिस्टियानो रोनाल्डो छैटौँ स्थानमा रहे । रोनल्डोले यो अवार्ड पाँच पटक जितेका छन् ।
महिलातर्फको बालोन डी ओर अवार्ड बार्सिलोनाकी एलेक्सिया पुटेलासले जितिन् ।
जर्मन क्लब बायर्न म्युनिखका पोलिस फरवार्ड रोबर्ट लेवान्डोस्कीले 'स्ट्राइकर अफ दि इयर हात पारे ।
बार्सिलोनाका स्पेनिस मिडफिल्डर पेड्रीले यू-२१ को उत्कृष्ट खेलाडी बन्दै कोपा ट्रफी प्राप्त गरे ।
इटालीका गोलकिपर जियानलुगी डोनारुम्माले यासिन ट्रफी प्राप्त गरे ।
क्लब अफ दि इयरको अवार्ड चेल्सीले जितेको छ ।
तस्बिर : एजेन्सी
