तेस्रो आँखा
काठमाडौं, १९ असार । नेपाल कम्युनिष्ट पार्टी एमालेले पार्टी भित्रैबाट भएका अन्तरघात तथा अराजकताका घटनाहरूको छानबिन र कारबाहीका लागि उपाध्यक्ष विष्णु पौडेलको संयोजकत्वमा समिति गठन गरिएको छ ।
आज बसेको पार्टी सचिवालय बैठकले तीन सदस्यीय समिति गठन गरेको हो । बैठकपछि पार्टीका प्रवक्ता पृथ्वी सुब्बा गुरुङले बैठकले आन्तरिक समस्याहरूका कारण सोचेबमोजिम नतिजा नआएको निष्कर्ष निकाल्दै अनुशासनहीनता, अराजकता र अन्तरघातका घटनाहरू असार मसान्तभित्र सबै तहका निर्वाचन समीक्षा गरिसक्ने सचिवालय निर्णय गरेको बताए ।
जिल्ला कमिटी र प्रदेश कमिटीलाई रिपोर्ट तयार गरेर हेडक्वाटरमा पठाउन भनिएको पनि उनले जानकारी दिए । निर्वाचनका क्रममा भएका अनुशासनहीनता र अराजकताका विषयमा परेका उजुरीहरूको छानबिन र कारबाहीका लागि उपाध्यक्ष पौडेलको नेतृत्वमा तीन सदस्यीय समिति बनाइएको गुरुङले जानकारी दिए । यो समितिलाई छानबिनका साथै कारबाहीको पनि अधिकार प्रत्यायोजन गरिएको छ ।
