तेस्रो आँखा
काठमाडौं । आजलाई पेशी तोकिएको चलचित्र विकास बोर्डका अध्यक्ष भुवन केसीविरुद्धको मुद्दालाई सर्वोच्च अदालतले हेर्न नभ्याइने सूचीमा राखेको छ ।
सोमबार न्यायाधीशद्वय प्रकाशकुमार ढुंगाना र कुमार रेग्मीको इजलासमा सुनुवाइ तोकिएको सो मुद्दाको पेशी भदौ १३ गतेलाई तोकिएको सर्वोच्च अदालतले जनाएको छ ।
नरेशकुमार पौड्यालसहित पाँच जना अध्यक्षका अन्य दाबेदारले शैक्षिक योग्यतामाथि प्रश्न उठाएर गत साउन ३० गते प्रधानमन्त्री तथा मन्त्रिपरिषद्को कार्यालय, सञ्चार तथा सूचना प्रविधि मन्त्रालय, चलचित्र विकास बोर्ड र भुवन केसीलाई विपक्षी बनाई रिट दायर गरेका थिए ।
केसी विरुद्धको यो मुद्दा यसअघि दुईपटक सुनुवाई हुन नसके पनि नयाँ तोकिएको मितिमा चाहिं अदालतको आदेश आउन सक्ने बताइएको छ । गत साता पनि अदालतले अन्तरिम आदेशका लागि अंकभारसहितको सक्कल फाइल झिकाउन आदेश दिएको थियो ।
