तेस्रो आँखा
काठमाडौं । घरेलु मैदानमा नै आयोजना भएको छैटौँ संस्करणको महिला साफ च्याम्पियनसिप फुटबल प्रतियोगितामा नेपाल उपविजेता बन्यो । प्रतियोगिता समापनसँगै राष्ट्रिय महिला फुटबल टोलीका तीन खेलाडीले अन्तरराष्ट्रिय खेलबाट संन्यास घोषणा गरेका छन् ।
संन्यास घोषणा गर्ने खेलाडीमा डिफेन्डर पुनम जर्घामगर छिन् भने मिडफिल्डरद्वय दीपा राई र इन्दिरा राई छन् । पुनमले सन् २०१४ मा पाकिस्तानमा भएको महिला साफ च्याम्पियनसिपकाट डेब्यु गरेकी थिइन् । उनले राष्ट्रिय टिमका लागि ३८ खेल खेलेकी छिन् ।
त्यसैगरी दीपा राईले पनि सन् २०१४ मा पाकिस्तानमै भएको साफ च्याम्पियनसिपबाट डेब्यु गरेकी थिइन् । उनले राष्ट्रिय टिमबाट ३६ खेल खेलेकी छिन् ।
त्यस्तै इन्दिरा राईले भने सन् २०१८ बाट राष्ट्रिय टिममा प्रवेश गरेकी थिइन् । उनले चीनमा आयोजना भएको मैत्रीपूर्ण खेलबाट राष्ट्रिय टोलीमा डेब्यु गरेकी हुन् । उनले राष्ट्रिय टिमबाट जम्मा पाँच खेल खेलेकी हुन् ।
उनीहरुलाई अखिल नेपाल फुटबल संघका अध्यक्ष पंकजविक्रम नेम्वाङ र राष्ट्रिय खेलकुद परिषद् (राखेप) का सदस्य-सचिव टंकलाल घिसिङले बिदाइ गरेका थिए । साफ च्याम्पियनसिपका विजेतालाई एन्फा अध्यक्ष नेम्वाङ र राखेपका सदस्य-सचिव घिसिङलगायतले पुरस्कारसमेत प्रदान गरेका हुन् ।
