काठमाडौं, १० माघ । संकटालाई पराजित गर्दै मछिन्द्र क्लब जारी आहा रारा गोल्ड कपको सेमिफाइनलमा प्रवेश गरेको छ ।
पोखरामा जारी २० औँ संस्करणको क्वार्टरफाइनल खेलमा संकटा क्लबलाई चार एकको गोल अन्तरमा पराजित गर्दै मछिन्द्र क्लब सेमिफाइनल प्रवेश गरेको हो ।
सोमबार पोखरा रंगशालामा भएको खेलमा खेलको १३ औं मिनेटमा उत्सव राईले गोल गर्दै मछिन्द्रलाई अग्रता दिलाएका थिए ।
पुन खेलको ४७ औं मिनेटमा ओलोमेउले मेसुकेले गोल गर्दै मछिन्द्रको अग्रतालाई दोब्बर बनाए ।
त्यसपछि संकटाको लागि खेलको ६३ औं मिनेटमा गणेश हमालले गोल गर्दै मछिन्द्र सँगको गोल अन्तरलाई घटाएर दुई एक बनाए ।
खेलको ८४ औं मिनेटमा अविशेक गुरुङले मछिन्द्रको लागि गोल गर्दै गोल अन्तरलाई तीन एक बनाए ।
मेसुकेले संकटा विरुद्ध आफ्नो दोस्रो गोल गर्दै चार एकको गोल अन्तर बनाएर मछिन्द्रको जित सुनिश्चित गरे ।
मेसुकेको दुई तथा उत्सव राई र अविशेक गुरुङको समान एक एक गोलमा मछिन्द्र पहिलो पटक आहा रारा गोल्ड कपको सेमिफाइनलमा प्रवेश गरेको हो ।
मंगलबार थ्री स्टार क्लब र त्रिभुवन आर्मी क्लब बीच पोखरा रंगशालामा नै दुई तीसमा खेल हुने छ । मंगलबार हुने खेल क्वार्टरफाइनलको अन्तिम खेल हो ।
