दाङ ७ भदौ । दाङमा एक महिनामा १९१ जनामा डेंगु संक्रमण पुष्टि भएको छ । गएको साउन १ गतेदेखि भदौ ७ गतेसम्म जिल्लामा १९१ जनामा डेंगु संक्रमण पुष्टि भएको स्वास्थ्य कार्यालय दाङका फोकल पर्सन कमल चन्दले जानकारी दिनुभयो । फोकल पर्सन चन्दका अनुसार घोराहीको राप्ती स्वास्थ्य विज्ञान प्रतिष्ठानमा साउन महिनामा १०४ जना र भदौ महिनामा ४० गरि १४४ जना बिरामीमा डेंगु संक्रमण पुष्टि भएको थियो ।

त्यसैगरी  तुलसीपुर स्थित राप्ती प्रादेशिक अस्पतालमा साउन महिनामा २० जना र भदौ ७ गतेसम्म २७ जना गरि ४७ जनामा डेंगु संक्रमण पुष्टि भएको थियो । सबै डेंगु संक्रमित उपचारपछि घर फर्कि सकेको फोकल पर्सन चन्दले तेस्रो आँखालाई जानकारी दिनुभयो । उहाँका अनुसार डेंगु संक्रमित सबैको अवस्था सामान्य छ ।

डेंगु भएको कसरी थाहा पाउने ?

- एक्कासी उच्च ज्वरो आउनु,
- लगातार ५ देखि ७ दिनसम्म ज्वरो आउनु,
- असाध्यै टाउको दुख्नु,
- आँखाको गेडी तथा आँखाको पछिल्लो भाग दुख्नु,
- ढाड जोर्नी तथा मांसपेशीहरु दुख्नु,
-शरीरमा बिमिरा आउनु ।

डेंगुबाट यसरी बच्नुहोस्

- डेंगुबाट बच्नका लागि लामखुट्टेको टोकाईबाट बच्नुपर्छ,
- पानी जम्न सक्ने भाँडाहरु जस्तैः गमला, फुलदानी, खाली बट्टा, अल्कत्रा वा मट्टितेलका खाली ड्रमहरु, गाडीको काम नलाग्ने टायर आदिमा पानी जम्न नदिने उपाय गर्नुपर्छ,
- पानीका ट्याङ्कीमा लामखुट्टे प्रवेश गर्न नदिने गरी ढाकेर राख्नुपर्छ,
- कूलरमा रहेको पानीमा प्रत्येक हप्ता एक(दुई चम्चा मट्टितेल हालिदिने साथै जम्मा भएको पानी सफा गर्ने,
- फुलदानीमा रहेको पानी कम्तीमा हप्तामा दुई पटक फेर्नुपर्छ,
- एडिस एजिप्टाई जातको लामखुट्टेले दिउँसो टोक्ने हुँदा दिउँसो बस्दा पनि प्रायः पूरा बाहुला भएको वा शरीर पुरै ढाकिने लुगा लगाउनु पर्छ,
- सम्भव भएसम्म दिउँसो सुत्दा पनि झुल प्रयोग गर्नु पर्छ साथै साना केटा केटीलाई जुनसुकै समयमा पनि झुलभित्र सुताउनु पर्छ,
- लामखुट्टेको टोकाईबाट बच्न लामखुट्टे भगाउने मल्हम पनि दल्न सकिन्छ ।
- घरका झ्याल ढोकामा जाली लगाउनु उपयुक्त हुन्छ ।
- घर वरिपरि सफा सुग्घर राख्ने, पानी जम्ने खाल्टाखुल्टी पुर्ने गर्नुपर्छ ।

त्यसैगरी यो अवधिमा जिल्लाका ४ जनामा मलेरिया देखा परेको छ । चार जनामध्ये एक जनाको नेपालगञ्ज मेडिकल कलेजमा उपचारको क्रममा साउन २१ गते मृत्यु भएको थियो । त्यस्तै एक जना मलेरिया संक्रमितको भेरी अस्पताल नेपालगञ्जमा उपचार भई रहेको छ भने दुई जना मलेरिया संक्रमित उपचारपछि घर फर्किएको चन्दले बताउनु भयो ।