काठमाडौं । नेपाली बजारमा सुनको मूल्यमा आइतबार ठूलो गिरावट आएको छ । शुक्रबार हालसम्मकै उच्च बिन्दुमा कारोबार भएको सुनको मूल्य साताको पहिलो कारोबार दिनमै तोलामा ४ हजार ८०० रुपैयाँले घटेर २ लाख ५३ हजार २०० रुपैयाँमा झरेको छ । यसअघि शुक्रबार छापावाल सुन प्रति तोला २ लाख ५८ हजार रुपैयाँ पुगेर नयाँ कीर्तिमान कायम गरेको थियो ।
नेपाल सुनचाँदी व्यवसायी महासंघका अनुसार, यो गिरावट पछिल्लो समयकै ठूलोमध्ये एक हो । अन्तर्राष्ट्रिय बजारमा देखिएको अस्थिरता र स्थानीय मागमा आएको परिवर्तनका कारण सुनको मूल्यमा यो कमी आएको व्यवसायीहरूले बताएका छन् ।
सुनसँगै चाँदीको मूल्यमा पनि गिरावट आएको छ । शुक्रबार प्रति तोला ३ हजार ३५० रुपैयाँमा कारोबार भएको चाँदी आइतबार तोलामा ७५ रुपैयाँले घटेर ३ हजार २७५ रुपैयाँमा कारोबार भइरहेको महासंघले जनाएको छ ।
