काठमाडौं । पछिल्लो चौबीस घण्टामा नेपालभर ६६ जनामा कोरोना भाइरस पुष्टि भएको छ । तीन हजार दुई सय ६२ जनाको नमुना परीक्षण गर्दा ६६ जनामा कोरोना भाइरस पुष्टि भएको स्वास्थ्य तथा जनसंख्या मन्त्रालयले जनाएको छ।
एक हजार एक सय ९० जनाको पिसिआर परीक्षण गर्दा ५९ जनामा र दुइ हजार ७२ जनाको एन्टीजेन परीक्षण गर्दा ७ जनामा कोरोना देखिएको हो । मन्त्रालयका अनुसार पछिल्लो चौबीस घण्टामा कोरोना संक्रमणको कारण कसैको मृत्यु भएको छैन ।
१३७ जना संक्रमित निको भएका छन् । हाल नेपालभर सक्रिय कोरोना संक्रमितको संख्या एक हजार चार सय पाँच रहेको छ ।
