काठमाडौँ । चालु आर्थिक वर्षको माघ मसान्तसम्म वित्तीय बजारमा २६ अर्ब ८३ करोड रुपैयाँ भन्दा बढी नगद प्रवाह बढेको छ । नेपाल राष्ट्र बैंकका अनुसार माघ मसान्तसम्ममा नगद प्रवाह ६ खर्ब ५२ अर्ब ६२ करोड ६१ लाख १९ हजार ८२७ रुपैयाँ पुगेको हो ।
२०८० असार मसान्तसम्म यस्तो प्रवाह ६ खर्ब २५ अर्ब ७८ करोड ७८ लाख ७२ हजार ५३० रुपैयाँ रहेको थियो । ७ महिनामा बजारमा क्यास सर्कुलेशन २६ अर्ब ८३ करोड ८२ लाख ४७ हजार २९७ रुपैयाँले बढेको छ ।
यसले पनि बजारमा तरलता सहज हुँदै गएको संकेत गर्छ । आर्थिक गतिविधि बढ्दा बजारमा नगद कारोबार बढ्ने हुँदा अर्थतन्त्र चलायमान बनाउन सहयोग पुग्छ ।
समीक्षा अवधिमा परिचालित नगद प्रवाह कूल गार्हस्थ्य उत्पादन (जीडीपी) को तुलनामा १२.१२ प्रतिशत हो । केन्द्रीय तथ्याङ्क कार्यालयका अनुसार नेपालको पछिल्लो जीडीपीको आकार ५३ खर्ब ८१ अर्ब ७३ करोड रुपैयाँ रहेको छ ।
