रोल्पा २ पुस । नेपाल प्राकृतिक सम्पदाले भरिपूर्ण देश हो । प्रकृतिका अनेक संरचनाहरु यहाँ देख्न सकिन्छ । रोल्पा पनि प्राकृतिक विविधताले भरिपूर्ण जिल्ला हो । रोल्पाका धेरै ठाउँहरु पर्यटकीय सम्भावनाको हिसाबले उत्कृष्ट गन्तव्य बन्न सक्छन् । यसैमध्येको एक हो रोल्पाको सुनछहरी गाउँपालिका २ भित्रिगाम स्थित बिबाङ दह।

बिबाङ दह प्राकृतिक सौन्दर्यताका साथै धार्मिक विविधताले सम्पन्न स्थान हो । भौगोलिक हिसाबले त्यहाँ पुग्न केहि गठिनाई भएपनि त्यहाँ पुग्ने पर्यटकहरुको मन अवस्य पनि जित्न सक्छ । पछिल्लो समय स्थानीय सरकारले समेत पर्यटन क्षेत्रका विकासका लागि चासो दिदा ओझेलमा परेका ठाउँहरुको प्रचारप्रसारसँगै आन्तरिक तथा बाह्य पर्यटक भित्रिने सम्भावना देखिन्छ ।

बिबाङ दह धार्मिक र प्राकृतिक हिसाबले महत्वपूर्ण मानिन्छ । यसका साथै यस क्षेत्रलाई युद्ध पर्यटनको दृष्टिले पनि बढी महत्वपूर्ण मानिन्छ । तत्कालिन १० वर्षे सशस्त्र द्वन्द्वको समयमा यस क्षेत्रमा विभिन्न घटनाहरु घटेकाले यसलाई युद्ध पर्यटनको रुपमा विकास गर्न सकिने स्थानीय बुद्धिजीविहरुको भनाई छ । यस ठाउँमा घुम्न जादा मनोकांक्षा पुरा हुने विश्वासका साथ घुम्न जाने प्रचलन रही आएको छ । अझ प्राकृतिक रुपले सुन्दर बिबाङ दह पुग्दा सबैको मन रमाउछ । चारै तिर बाक्लो वन क्षेत्रले ओगटेको उक्त स्थान प्राकृतिक सौन्दर्यताको उपज मानिन्छ।

पर्यटन क्षेत्रको विकास गर्ने उदेश्यले सुनछहरी गाउँपालिकाले बिबाङ दह क्षेत्रमा कार्यपालिका वैठक सञ्चालन गरेर पर्यटन विकासका लागि विभिन्न निर्णयहरु समेत गरेको थियो । स्थानीय सरकारले उक्त स्थानमा वैठक सञ्चालन गरेर विभिन्न निर्णय गर्दै पर्यटन विकासका लागि विवाङ दह घोषणा पत्र समेत सार्वजनिक गरेको थियो । उक्त घोषणा पत्रमा सुनछहरी गाउँपालिका भित्रका पर्यटन सम्पदाको संरक्षण र प्रर्वदन गर्दै आन्तरिक तथा बाह्य पर्यटक भित्र्याउने लक्ष निर्धारण गरिएको सुनछहरी गाउँपालिकाका प्रवक्ता अमरजित पुनले तेस्रो आँखालाई बताउनुभयो ।

बिबाङ दहलाई पर्यटकीय गन्तव्यको रुपमा विकास गर्नका लागि पूर्वी रोल्पाका तिन स्थानीय तहले साझा एजेण्डाका रुपमा समेत अघि सारेका छन् ।सुनिलस्मृति गाउँपालिका, लुङ्ग्री गाउँपालिका र सुनछहरी गाउँपालिकाले पर्यटकीय क्षेत्रको विकासका लागि साझा एजेण्डा तयार पारेका छन् । साझा एजेण्डा तयार पार्दै तिन गाउँपालिका पर्यटन क्षेत्रको विकासका लागि प्रदेश र संघ सरकारसँग समन्वय गर्ने जनाएका छन् ।

पर्यटन विकासका लागि लुङ्ग्री गाउँपालिकामा अवस्थित वडाचौर विमानस्थलदेखि सुनछहरी गाउँपालिकामा रहेको सुनछहरी झरणा/कोठी भिर/टिलाचन दह/बुजुधुरी जलजला/ओख्रेनी हुदै अन्तिम गन्तव्यको रुपमा सुनिलस्मृति गाउँपालिकामा अवस्थित गजुलकोट दरबारसम्म गुरिल्ला पदयात्राको रुपमा विकास गर्ने लक्ष लिएको सुनछहरी गाउँपालिकाका अध्यक्ष धन बहादुर पुनले तेस्रो आँखालाई बताउनुभयो ।

स्थानीय सरकारले पर्यटनका लागि केहि चासो दिदा स्थानीय खुशी देखिन्छ । कृषि उत्पादनको हिसाबले पनि बढी सम्भावना भएको यस क्षेत्रमा सडक पूर्वाधार पुग्न सकेको छैन् । बजार पुग्नका लागि लामो समय हिड्नुपर्ने यस क्षेत्रमा सडक पूर्वाधारसँगै पर्यटनको विकास हुन आवश्यक छ । यसो भए यहाँको उत्पादनले बजार पाउनुका साथै यहाँ उत्पादित सामग्रीले बजार समेत पाउने थियो ।