तेस्रो आँखा
दाङ । दाङको एउटा सामुदायिक वनमा वन व्यवस्थापनको नाउमा धमाधम वन फडानी भइरहेको छ ।
दंगीशरण गाउँपालिका–६ मा रहेको भवानी सामुदायिक वनमा वन व्यवस्थापन गर्ने भन्दै वन फडानी भएको हो । उक्त सामुदायिक वनमा कटान अनुमति लिएको भन्दै ठेक्कामा रुख काट्न दिइएको छ ।
वन कटान गर्दा स्थानीयलाई रोजगारी दिनुपर्ने भएपनि उक्त सामुदायिक वनले काठका ठेकेदारहरुलाई प्रति क्युफिट ३५ रुपैयाँका दरले शान्तिनगर गाउँपालिकाका ठेकेदारलाई रुख कटान गर्ने जिम्मा दिइको स्थानीयको भनाई छ ।
उनीहरुले जथाभावी रुपमा धमाधम वन फडानी गरिरहेका छन् । स्थानीयका अनुसार ठेकेदारले सामुदायिक वनका प्रतिनिधि र वन कार्यालयका प्रतिनिधि विनै धमाधम रुख कटिरहेका छन् ।
सामुदायिक वनका अध्यक्ष भिमबहादुर विकले वन कार्यालयको अनुमति अनुसार वन कटान गरेको बताए ।
यस्तै वन कार्यालय दंगीशरणका रेञ्जर जयचन्द्र आचार्यले उक्त सामुदायिक वनले जिल्ला वनबाटै अनुमति लिएर कटानको काम गरिरहेको बताएका छन् । त्यसको अनुगमन गरिरहेको उनले बताए । तर स्थानीयले भने वनका प्रतिनिधि नआएको बताएका छन् ।
